Այսօր ՀՀ պետական եկամուտների կոմիտեի նախագահ Վարդան Հարությունյանը լրագրողների հետ հանդիպմանն ամփոփեց անցած 9 ամսվա գործունեության արդյունքները:
«Ամեն ամիս հարկային եկամուտների շարունակական աճ է արձանագրվել և բիզնես հանրության ուղղված բարեփոխումներ են նախաձեռնվել, որոնց մի մասը ավարտին դեռ չի հասցվել»,-ասաց նա:
ՊԵԿ նախագահը հայտնեց, որ 2017 թ. 9 ամիսների ընթացքում Պետական եկամուտների կոմիտեն ապահովել է 860,5 մլրդ դրամ հարկային եկամուտներ՝ ներառյալ ԱԱՀ-ի վերադարձի գումարները:
Նախորդ տարվա ինը ամիսների համեմատ հարկային մասով աճը կազմել է 6.7 տոկոս, մաքսային մասով՝ 18.3 տոկոս:
ՊԵԿ նախագահի խոսքով՝ նախորդ տարվա 9 ամիսների համեմատ պետական բյուջեի եկամուտների աճը կազմել է ավելի քան 74 մլրդ դրամ կամ 9.4 տոկոս: «Հատկանշական է, որ մուտքերի աճն ապահովվել է հարկային վարչարարության արդյունավետության բարձրացման շնորհիվ` գերավճարների, ապառքների և ստուգումների կրճատման պայմաններում»,-ասաց նա:
Վարդան Հարությունյանը հայտնեց, որ 2017թ. հոկտեմբերի 1-ի դրությամբ պետական բյուջե հավաքագրվող հարկատեսակներին վերաբերող իրական գերավճարները, որոնք չեն առաջացել ներկայացված հաշվարկների արդյունքում, նվազել են 7.2 մլրդ դրամով, իսկ չվճարված հարկերի գծով պարտավորությունները (ապառք) 2016թ. հոկտեմբերի համեմատ նվազել են 6.5 մլրդ դրամով:
ՊԵԿ նախագահն ասաց նաև, որ 2017 թվականի տարեսկզբից երկարատև օգտագործման ապրանքների ներկրման աճ է արձանագրվել, ինչը տնտեսության դրական միտումներ է փաստում՝ բնակչության գնողունակության աճից մինչև մաքսային վարչարարության բարելավում: «2017 թվականի հունվարից գնահատվում է հարյուր միլիոն դրամ և ավել իրացման շրջանառություն հայտարարած 4537 առևտրային հարկ վճարողների մոտ առկա ստվերը: Վերլուծությունների արդյունքում` 2085 –ի մոտ վերհանվել են ռիսկեր և գնահատված ստվերի հիման վրա հաշվարկված պետական եկամուտների միջին ամսական ռիսկը սեպտեմբերի մեկի դրությամբ կազմել է շուրջ 2,8 միլիարդ դրամ»,-ասաց նա:
Վարդան Հարությունյանն ասաց, որ ռիսկային համարված հարկ վճարողներին առաջարկվել է սեղմ ժամկետում ներկայացնել ճշտված հաշվարկներ և կամավոր վճարել չվճարված հարկերը «2017 հունվար-սեպտեմբեր ամիսներին ՊԵԿ օպերատիվ հետախուզության վարչության կողմից իրականացված արդյունքները ամփոփելով հետևյալ պատկերն ունենք. շուրջ երկու հազար միջոցառում է իրականացվել և արձանագրվել է 2,2 մլրդ դրամի բյուջե լրացուցիչ վճարման ենթակա գումար»,-ասաց նա: