Ավստրիայի արտաքին գործերի նախարար Սեբաստիան Կուրցը հայտարարել է, որ երկիրը դեմ է Եվրամիության և Թուրքիայի միջև մաքսային միության պայմանագրի ընդլայնմանը, և այդ հարցում լիովին աջակցում է Գերմանիային:
Ինչպես գրում է թուրքական «Հյուրրիյեթ» պարբերականը, Կուրցը պահանջել է, որ ԵՄ-ն այդ հարցում Թուրքիայի նկատմամբ ավելի վճռական դիրքորոշում դրսևորի:
Ըստ նրա՝ պետք է անհապաղ դադարեցվեն նաև Թուրքիայի՝ ԵՄ անդամ դառնալու շուրջ բանակցությունները, քանի որ Եվրոպան չպետք է անհաղորդ մնա Թուրքիայում կատարվող անօրենություններին:
Ավստրիայի ԱԳՆ ղեկավարը տեղեկացրել է, որ պատրաստվում է քննարկել հարցը ԵՄ-ի անդամ երկրների արտգործնախարարների հետ:
Հիշեցնենք, որ օրեր առաջ Գերմանիան վետո է սահմանել ԵՄ մաքսային միության և Թուրքիայի միջև պայմանագրի ընդլայնման շուրջ բանակցությունների համար։
Թուրքիայի և Մաքսային միության միջև պայմանագրի կետերի շուրջ տարվող բանակցությունները կարող են տևել մինչև 2018թ.:
Տվյալ պայմանագրի կետերը նախատեսում են, որ Թուրքիան ոչ միայն ազատ կարտահանի իր գյուղատնտեսական ապրանքները եվրոպական շուկա, այլև հնարավորություն կստանա մասնակցելու ԵՄ երկրներում կազմակերպվող պետական աճուրդներին:
↧
Ավստրիան նույնպես դեմ է ԵՄ-ի և Թուրքիայի միջև մաքսային միության պայմանագրի ընդլայնմանը. Կուրց
↧