Թուրքիայում շուրջ 60 խոշոր գործարարի ունեցվածքն ամբողջությամբ առգրավվել է պետության կողմից, գրում է թուրքական «Ջումհուրիյեթ» թերթը:
Գործարարները մեղադրվում են հուլիսի 15-ի հեղաշրջման փորձի կազմակերպիչներին ֆինանսական աջակցություն ցույց տալու համար:
Բացի այդ, 208 թուրքական խոշոր ընկերություն նույն մեղադրանքով տուգանվել է պետության կողմից 2.7 մլրդ թուրքական լիրայի չափով:
Հիշեցնենք, որ հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: