Ռուսաստանն Իրանին հարձակողական զենք չի մատակարարի, թեև Թեհրանը հետաքրքրություն է ցուցաբերում ռուսական արտադրության տանկերի և կործանիչների հանդեպ։ Այդ մասին «Կոմերսանտ» թերթին տված հարցազրույցում ասել է «Ռոստեխ» կորպորացիայի գլխավոր տնօրեն Սերգեյ Չեմեզովը:
Նրա խոսքով՝ Իրանը հետաքրքրված է Ռուսաստանից T-90 տանկերի և Су-30СМ կործանիչների գնման հարցում, սակայն նման զենք այնտեղ մատակարարել արգելում են պատժամիջոցները, որոնք սահմանվել են Թեհրանի նկատմամբ ՄԱԿ-ի Անվտանգության խորհրդի կողմից:
Այս առիթով Չեմեզովը նշել է, որ ՌԴ-ն պատրաստ է Իրանին մատակարարել միայն այնպիսի սպառազինություն, որը չի մտնում այդ պատժամիջոցների մեջ: Մասնավորապես՝ նա հույս ունի, որ մինչև այս տարվա վերջ կկարողանան ամբողջությամբ իրականացնել Իրանի հետ С-300 զենիթային համալիրների մատակարարման վերաբերյալ պայմանագիրը:
«Մենք ոչ մի անգամ չենք խախտել միջազգային պայմանավորվածությունները: Չենք խախտի և այժմ»,- ասել է Չեմեզովը: