Amazon-ը տեսանյութեր վերբեռնելու համար սեփական Amazon Video Direct ծառայությունն է թողարկում, որը կմրցակցի YouTube տեսահոսթինգի հետ:
Ինչպես տեղեկացնում է Tech Insider-ը` ծրագիրը տեսանյութ պատրաստողներին հնարավորություն կտա գումար վաստակել հոնորարների և գովազդների միջոցով` ըստ վերբեռնված տեսանյութերի հեռարձակվող րոպեների:
Նշվում է, որ Amazon-ի նոր հարթակը նախատեսված է «պրոֆեսիոնալ» տեսանյութ ստեղծողների համար: Միակ պահանջն այն է, որ տեսանյութը պետք է լինի HD ձևաչափով և փակ ենթագրեր ունենա:
Տեսանյութը տեղադրողները կկարողանան ընտրել` ինչպես դիտելի դարձնել իրենց նյութը ծառայությունում` թույլ տալով օգտատերերին ներբեռնել, հեռարձակել, վարձել կամ գնել իրենց տեսանյութերը:
Amazon-ից հայտնում են, որ նյութեր հրապարակողները հասանելիություն կունենան ծառայության այցելությունների և դիտման վերլուծական տվյալներին: