ԱՄՆ-ն և ԵՄ-ն աջակցում են Եվրոպայի մի շարք էներգետիկ ենթակառուցվածքային նախագծերին. ինչպես տեղեկացնում է РИА Новости գործակալությունը, այդ մասին ասված է Վաշինգտոնում կայացած Էներգետիկ հարցերով ԱՄՆ-ԵՄ խորհրդի նիստն ամփոփող հայտարարության մեջ:
«Խորհուրդը հաստատել է իր աջակցությունը Հարավային գազային միջանցքի բացմանը՝ ներառյալ Տրանսադրիատիկ գազատարը, ընդգծել է Հունաստան-Բուլղարիա միջազգային հանգույցի կարևորությունը, և Խորվաթիայում, ինչպես նաև Հունաստանում հեղուկ բնական գազի տերմինալների կառուցումը, եթե դրա պահանջարկը կա շուկայում»,-ասված է հայտարարության մեջ:
Այլ նախագծերի թվում հիշատակվում են Լեհաստան-Լիտվա միջազգային հանգույցը, որը պետք է դեպի Ֆինլանդիա և Բալթյան երկրներ գազի այլընտրանքային մատակարարում ապահովի:
«Էլեկտրականության ոլորտում Խորհուրդը կարևորել է բալթյան երկրների լիակատար ինտեգրումը ԵՄ-ի ներքին էներգետիկ շուկային, և ողջունել է Լիտվա-Լեհաստան և Լիտվա-Շվեդիա էներգահաղորդակցության գծերի ավարտը՝ 2015 թվականի դեկտեմբերին»,-ասված է հայտարարության մեջ:
ԱՄՆ-ԵՄ էներգետիկ հարցերով խորհրդի նիստը տեղի է ունեցել երեկ՝ ԱՄՆ պետքարտուղար Ջոն Քերիի և եվրոպական դիվանագիտության ղեկավար Ֆեդերիկա Մոգերինիի համանախագահությամբ: