Մի շարք միջազգային ընկերություններ, որոնք լյուքս դասի զբոսանավերով ծովային շրջագայություններ են կազմակերպում, գալիք տարվա համար նախատեսվող երթուղիները նախագծելիս հրաժարվել են Թուրքիայի տարածքում իրականացվող կանգառներից`անվտանգության նկատառումներով: Այս մասին հաղորդում է թուրքական Haberler.com կայքը:
Դեկտեմբերի 10-ին Ստամբուլում տեղի ունեցած ահաբեկչությունից հետո ամերիկյան «Princess Cruises» լյուքս դասի զբոսանավի երթուղուց հանվել են 2017-ի համար դեպի թուրքական նավահանգիստներ նախատեսված բոլոր 50 ուղևորությունները:
Ծովային զբոսաշրջության ոլորտի ընկերություններից մեկի ղեկավար, թուրք գործարար Էրքութ Օնենը նշում է, որ միջազգային ընկերությունները գրեթե 80 տոկոսով կրճատել են թուրքական նավահանգիստներում իրենց կանգառների թիվը:
Թուրք գործարարը նաև ընդգծել է, որ թուրքական նավահանգիստների փոխարեն միջազգային հայտնի ընկերությունները նախապատվությունը տալիս են Հունաստանի կղզիներին և Մոնտենեգրոյին:
